خط (1) — 1902ء (جلد اوّل، خط 3)

ڈیر سراج¹

دو تین روز سے طبیعت بہ سبب دورۂ درد کے علیل ہے۔ یہ چند شعر قلم برداشتہ آپ کے شکریہ میں عرض کرتا ہوں۔ میرا ارمغان یہی ہے اسی کو قبول کر کے مجھے مشکور² کیجیے چاہیں تو پیشانی پر چند اُردو سطور لکھ کر مخزن میں بھیج دیجیے۔ والسّلام

آپ کا اقبال از لاہور

1902ء

(اقبال نامہ)

خط (2) — 11 مارچ 1903ء (جلد اوّل، خط 6)

لاہور۔ بھاٹی دروازہ

11؍ مارچ 1903ء

برادرِ مکرم۔ السلام علیکم

آپ کا خط ابھی ملا۔ الحمد للہ کہ آپ خیریت سے ہیں۔

آج عید کا دن ہے اور بارش ہو رہی ہے۔ گرامی صاحب تشریف رکھتے ہیں اور شعر و سخن کی محفل گرم ہے۔ شیخ عبدالقادر ابھی اُٹھ کر کسی کام کو گئے ہیں۔ سیّد بشیر حیدر بیٹھے ہیں اور ابرِ گہربار کی اصل علّت کی آمد آمد ہے۔ یہ جملہ شاید آپ کو بے معنی معلوم ہو گا۔ مگر کبھی وقتِ ملاقات آپ پر اُس کا مفہوم واضح ہو جائے گا۔ آپ کے خط نے ایک بڑی²⁴ فکر سے نجات دی۔ مجھے تین روز²⁵ سے اس بات کی کاوش تھی کہ نظم کہیں سے ملے تو ارسال²⁶ کروں۔ الحمد للہ کہ آپ کو مل گئی۔ آپ کی داد کا مشکور ہوں اور اس کو کبھی تصنّع نہیں سمجھتا۔ آپ کو کس بات سے یہ اندیشہ پیدا ہوا۔

ترتیبِ اشعار کی خود مجھے فکر²⁷ ہو رہی ہے۔ مگر یہ خیال ہے کہ ابھی کلام کی مقدار تھوڑی ہے۔ بہر حال جب یہ کام ہو گا تو آپ کے صلاح و مشورہ کے بغیر نہ ہو گا۔ مطمئن رہیں۔ ملٹن²⁸ کی تقلید میں کچھ لکھنے کا ارادہ مدت سے²⁹ ہے اور اب وہ وقت قریب معلوم ہوتا ہے کیونکہ ان دنوں وقت کا کوئی لحظہ خالی نہیں جاتا جس میں اس کی فکر نہ ہو۔ پانچ چھ سال سے اس آرزو کو دل میں پرورش کر رہا ہوں مگر جتنی کاوش آج کل محسوس ہوتی ہے اس قدر کبھی نہ ہوئی³⁰۔ فکرِ روزگار سے نجات ملتی ہے تو اس کام کو باقاعدہ شروع کروں گا ابرِ گہربار شروع کرنے سے پیشتر میں نے اس خیال سے کہ کوئی وہابی³¹ اس کے بعض اشعار پر کوئی فتوےٰ نہ دے دے، چند باتیں تمہید میں بھی کہی تھیں اور ایک غزل بھی کہی تھی جو ارسالِ خدمت کرتا ہوں۔

بلبل کی فریاد³³

کاغذ ختم ہو گیا ہے دل بھی اکتا گیا ہے میں سمجھتا ہوں میں نے بڑی ہمت کی کہ اتنے اشعار نقل کر لیے اور آپ کو بھی خط لکھ گیا³⁴۔ الحمد للہ علیٰ ذٰلک۔ مندرجہ بالا نظم کی بندش ملاحظہ فرمائیے۔ چونکہ بچوں کے لیے ہے اس واسطے اضافات اور وقتِ مضمون سے خالی ہے۔ علاوہ بریں³⁵ فریاد کرنے والا آخر پرندہ ہے۔ والسّلام۔ صادق علی خاں صاحب³⁶۔ عنبر صاحب اور دیگر احباب کی خدمت میں سلام عرض کریں۔

آپ کا صادق محمد اقبال

1۔ اقبال نامہ

2۔ معاصرینِ اقبال کی نظر میں

خط (3) — 4 اکتوبر 1915ء (جلد اوّل، خط 157)

لاہور 4؍ اکتوبر 1915ء

مخدومی۔ السلام علیکم

آپ کا نوازش نامہ ملا جس کو پڑھ کر مُجھے بڑی مسرت ہوئی۔ الحمد للہ کہ آپ کو مثنوی پسند آئی۔ آپ ہندوستان کے ان چند لوگوں میں ہیں جن کو شاعری سے طبعی مناسبت ہے اور اگر نیچر ذرا فیاضی سے کام لیتی تو آپ کو زمرۂ شعرا میں پیدا کرتی۔ بہر حال شعر کا صحیح ذوق شاعری سے کم نہیں بلکہ کم از کم ایک اعتبار سے اس سے بہتر ہے۔ محض ذوقِ شعر رکھنے والا شعر کا ویسا ہی لطف اٹھا سکتا ہے جیسا کہ خود شاعر اور تصنیف کی شدید تکلیف اُسے اٹھانی نہیں پڑتی۔

یہ مثنوی گذشتہ دو سال کے عرصے میں لکھی گئی۔ مگر اس طرح کہ کئی کئی ماہ کے وقفوں کے بعد طبیعت مائل ہوتی رہی۔ چند اتوار کے دنوں اور بعض بے خواب راتوں کا نتیجہ ہے۔ موجودہ مشاغل وقت نہیں چھوڑتے اور جوں جوں اس پروفیشن میں زمانہ زیادہ ہوتا جاتا ہے کام بڑھتا ہی جاتا ہے۔ لٹریری مشاغل کے امکانات کم ہو جاتے ہیں۔ اگر مجھے پوری فرصت ہوتی تو غالباً اس موجودہ صورت سے یہ مثنوی بہتر ہوتی اس کا دوسرا حصّہ بھی ہوگا جس کے مضامین میرے ذہن میں ہیں۔ مجھے یقین ہے کہ وہ حصّہ اس حصّہ سے زیادہ لطیف ہوگا۔ کم از کم مطالب کے اعتبار سے، گو زبان اور تخیّل کے اعتبار سے میں نہیں کہہ سکتا کہ کیسا ہوگا۔ یہ بات طبیعت کے رنگ پر منحصر ہے جو اپنے اختیار کی بات نہیں۔