(صفحہ 9)

قوم کا اندازِ نظر بدل دینا یہ ایک بڑا کارنامہ ہے۔ جو خاص اور برگزیدہ آدمیوں کے حصے میں آتا ہے۔ اور اگر وہ اندازِ نظر صحیح ہے تو اسی سے حیات تازہ پیدا ہوتی ہے۔ اس نئی زندگی کے پروں سے قوم بلند پروازیاں کرتی ہے۔ مگر اس کی بلند پروازیاں آئین کی پابندی پر منحصر ہوتی ہیں۔ یہ ایک عجیب صداقت ہے۔ جس پر اس مثنوی میں جابجا زور دیا گیا ہے۔ کہ آئین یا قانون جو بظاہر پابندی ہے۔ یہی اصل میں آزادی کی بنا ہے۔ اور جو قومیں آئین کی پابندیاں اپنے اوپر لازم کیے بغیر آزادی کے خواب دیکھتی ہیں وہ ایک خیال خام میں مبتلا ہیں جو ان کو منزلِ مقصود سے ہمیشہ دور رکھے گا۔ اس سلسلے میں یہ جتایا گیا ہے، کہ آئینِ اسلام کا بنیادی پتھر توحید ہے، یعنی خدائے واحد پر ایمان لانا۔ ایک کلمہ، ایک کعبہ، ایک کتاب، ایک سنت یا دستور العمل، یہ اینٹیں ہیں جن کے ساتھ وہ بنیادی پتھر مضبوط گڑا ہوا ہے۔ ملت کے استحکام کے لئے ہم آہنگی کی ضرورت ہے۔

(صفحہ 14)

یہ مشہور مسئلہ ہے کہ اسلام میں ملت کی بنا نہ ایک ملک کے باشندے ہونے پر ہے اور نہ ایک نسل پر، بلکہ ہم مذہب یعنی ہم عقیدہ اور ہم خیال ہونے پر ہے۔ مگر اس زمانہ میں اکثر لوگ اس رائے کی طرف مائل ہیں کہ یہ ہم خیالی کا رشتہ گو خالی از اثر نہیں، مگر ایسا مضبوط نہیں ہو سکتا، جیسا وہ رشتہ جس کی بنا قومیت یا وطنیت پر ہو، اور اس رائے کی تائید میں بعض ممالک کے جوشِ قومیت یا وطنیت کی مثالیں پیش کی جاتی ہیں، اور اس کے مقابل میں موجودہ دنیائے اسلام کی منتشرہ اور غیر متحدہ حالت دکھائی جاتی ہے۔ اس مسئلہ پر کوئی قطعی فیصلہ کرنا اس مختصر ریویو میں ممکن نہیں، مگر عام اسلامی خیال اب تک مذہبی بنا ہی کو بہتر سمجھتا ہے، اور اس بارے میں حضرت اقبال کا مذہب اس خیال کے عین مطابق ہے۔ اس کی تائید میں جو دلائل انہوں نے پیش کیے ہیں۔ نظم میں آجانے سے ان کا زور دوبالا ہو گیا ہے۔ میرے خیال میں اس سے زیادہ پرزور الفاظ میں اس مسئلے کو بیان کرنا ممکن نہیں ہے۔

(صفحہ 15-16)

قومی زندگی کی بنیادِ یکدلی پر رکھ کر قومی خیالات کی تدبیروں کا ذکر شروع کیا گیا ہے۔ پہلے تنبیہ کی ہے کہ یاس و ناامیدی قومی زندگی کے لئے زہر کا حکم رکھتی ہیں۔ ترقی چاہنے والی قوموں کو چاہیے کہ ناامیدی کو پاس نہ آنے دیں، حوصلے بلند رکھیں، اور سرگرم جستجو رہیں۔ ناامیدی عموماً خوف سے پیدا ہوتی ہے یا غم سے، اس لئے خوف اور غم سے بھی الگ رہنا چاہیے۔ اس ہدایت پر عمل کی تاکید کرتے ہوئے مثنوی میں آیات و احکام قرآنی کے حوالے پیش کیے گئے ہیں، اور بتایا گیا ہے کہ سوائے خدا کے کسی سے ڈرنا شانِ ایمان کے خلاف ہے، اور جب بیمِ غیراللہ سے نجات ہو، تو کوئی کام ایسے آدمی کے لئے دشوار نہیں ہوتا۔

(صفحہ 20)

اس سلسلہ میں ایک حکایتِ اورنگ زیب عالمگیر درج کی ہے۔ جس پر جنگل میں نماز پڑھنے کی حالت میں شیر نے حملہ کیا، مگر بادشاہ اس سے نہ ڈرا، اور بغیر تاک کے ضرب لگانے کے اس نے خنجر کا ایسا وار کیا کہ شیر کو ہلاک کر دیا، اور پھر مصروف نماز ہو گیا۔ اس حکایت کو نظم کرتے ہوئے اورنگ زیب کی خدماتِ مذہبی کی تعریف کی ہے، اور اس ساری تعریف کی جان یہ شعر ہے، جو عالمگیر کی شان میں کہا گیا ہے۔ دوسرے مصرعہ کی بلاغت خصوصاً قابل داد ہے۔

(صفحہ 23)

اس کے بعد ملت اسلامی کو بتایا گیا ہے کہ مسلمانوں کا باہمی رشتہ جنابِ رسالت مآب صلعم کی ذاتِ بابرکات کی بدولت مضبوط ہے۔

(صفحہ 30)

پھر ملت اسلامی کی خصوصیات چند پُر معنی شعروں میں بیان کی ہیں، اور بتایا ہے کہ حریت اور مساوات اس ملت کی سرشت میں داخل ہیں۔ اسلامی مساوات کی تمثیل کے طور پر ایک درد انگیز تاریخی روایت نظم کی گئی ہے۔ لکھتے ہیں کہ سلطان مراد نے ایک مسجد بنوائی تھی، جو ملکِ خجند کے رہنے والے ایک پردیسی معمار نے بنائی تھی۔ بادشاہ کو اس کی عمارت کچھ ناپسند ہوئی، اور اس نے معمار کا ہاتھ کاٹ دیا۔ اس معمار نے قاضی کی عدالت میں بادشاہ کے برخلاف استغاثہ کیا۔ بادشاہ عدالت میں طلب کیا گیا۔ قاضی نے مقدمہ سننے کے بعد فتویٰ دیا، کہ

یہ فتویٰ سن کر بادشاہ نے اپنا ہاتھ کاٹے جانے کے لئے پیش کیا

(صفحہ 38)

یعنی قانون نے ہاتھ کاٹنے کے عوض میں ہاتھ کاٹنے کا فتویٰ دے دیا، مگر خود مستغیث کو رحم آگیا، اور اس نے اپنا بدلہ نہیں لیا۔ اور بادشاہ کو معاف کر دیا۔ آگے چل کر میدان کربلا میں حضرت امام حسین کی شہادت کے متعلق ایک پُر درد باب لکھا ہے، جس میں یہ ظاہر کیا ہے، کہ حضرت امام حسین کی شہادت حریت کی بنیاد رکھنے کے لئے اور ضمیرِ انسانی کا حقِ آزادی قائم کرنے کے لئے تھی۔

(صفحہ 43)